٢٠ ديسمبر ٢٠٠٨

كبل ابن كبل صحيح!!



كل يوم والتانى يطلع لنا فى المقدر

اللى يقولك فاصل ونواصل!

واللى يقولك اتصل ب 0900999999

لو كنت تخين
اتصل تبقى فتلة

لو مخنوق فضفض لنا
واحنا نسمع بلاويك

اة ماهى ناقصاك

ودلوقتى قال اية كابلات بحرية


كبل ابن كبل صحيح
!!

١٨ ديسمبر ٢٠٠٨

بلاش حركات؟



تعلن شركة بيبسى العالمية

ان اى لبش فى اى ازازة

سواء خشب بلاستك معادن

انها عهدة رسمية

وتم وضعها فى الازازة بالغلط

وعلى من يجدها اعادتها للشركة مرة تانية

والا ...

والحركات دى احنا عارفنها

وانا قلت اهة

(اه يا بلد)

١٧ ديسمبر ٢٠٠٨

الى اين؟



الى اين المسير

واين انا ذاهب

اترى انا على حق؟

وان هذا هو الطريق

لماذا استمر فى المسير

والدرب ظلام

ولماذا اتوقف عندما المح نورا من بعيد

ادور فى دوامات كثيرة

اختلفت المسميات
واختلفت الشخوص

ولا زلت ابحث عن طريق

١٦ ديسمبر ٢٠٠٨

حلم




احلم بان اذهب الى مكان

مكان ما

بعيدا عن العيون
واجراس الهاتف النقال
وصياحات الناس
والابتسامات الزائفة

مكان

انظر فية الى السماء الصافية
ارى غيمات بيضاء رقيقة
تتحرك كما الحلم

والمح من بعيد
بطتان صغيرتان تسبحان فى مرح
انهما لا يملكان شيئا
ولكنهم سعداء
اسعد منى كثيرا

١٥ ديسمبر ٢٠٠٨

مشوار




الحياة مش دايما ورود وزهور وجناين

اوقات الارض بتتسحب من تحت رجلينا

ونلاقى الموج محاصرنا

بنغرق والحياة بتتبخر من جوانا

ولكن

مهما الطريق طال وصعب وكان ليل ورا ليل

هوة مشوار ولازم نمشية

١٤ ديسمبر ٢٠٠٨

وقفة مع النفس




كثيرا ما نشعر اننا فى دوامات

جذب وشد

من كل مكان وكل اتجاة

لا مفر ولا مهرب

ولكن لماذا لا ناخذ نفسا عميقا

نغمض عينانا قليلا

نحاول ترتيب اوراق تصرفاتنا

اين الصواب واين الخطا

نهدىء قليلا من انفعالاتنا

نعم هى حياة صاخبة

ولكن وقفة مع النفس

ستجعل للحياة مذاق ولون اخر

لم لا نجرب؟

١٣ ديسمبر ٢٠٠٨

بهدوء



مشهد شديد الرقة

تعبر هى واولادها الصغار عرض الطريق

يتوقف المارة والسيارات الفارهة

لماذا توقفوا؟

انة احتراما لحقها فى الحياة

ولكن اين وصلنا من هذا ومن صار يحترم من

ولماذا يحترم وهل هو بالاصل يشعر بالزهو امام نفسة

كم نفتقد الى الجمال والاحساس فى حياتنا

١٢ ديسمبر ٢٠٠٨

رشيتوا فليت النهاردة




وبعدين باة فى العالم ولاد ال.....اللى ملوا البلد

انتوا اية رايكوا؟

ومين فى رايكوا اللى لو معانا فليت نرشهم ونموتهم بية الاول؟

١١ ديسمبر ٢٠٠٨

اين؟



كم اتمنى ان ابتعد قليلا
ابتعد عن كل شىء
اصوات الحياة الصاخبة من حولى
مللت كثيرا من تعاملات البشر
كلها اقنعة مزيفة
اين الحقيقة
مللت انفلات الاخلاق الرهيب من حولنا
اين الامان
اين نجد انفسنا

١٠ ديسمبر ٢٠٠٨

انا واللحمة




بالضبط زى اول يوم فى العيد لما اتقابلت مع طبق الفتة باللحمة الضانى
اتفضلوا حتة!!

٩ ديسمبر ٢٠٠٨

العيد فرحة




منظر مبهج جدا امبارح

الناس فى اماكن كتير متجمعين عند ابواب العمارات او عند الجزار ملتفين حوالين الاضحية

بقرة كانت عجلا كان او من بنى خروف

منظر جميل واكثر ما اسعدنى فية منظر البنات الاطفال وهمة بلبس العيد

الوان فوشيا وروز وتركواز وبوتات سودة وبنى جميلة

عاملين شعرهم غزلان او سايبينة

منظر شديد الرقة والبراءة

حسيت ان الكون مش وحش اوى اوى زى مانا متاكد

حسيت ان لسة فية قليل من البراءة جوانا وحوالينا

ما احلى البراءة

٦ ديسمبر ٢٠٠٨

بيب بيب عيد سعيد يا حلوين




كل سنة وكلكم طيبين

انتا وانتى ... اة وانا كمان

وكل سنة وانتوا من اللحمة واكلين

الديت منها والسمين

وفى اول يوم من الفتة ضاربين

وكلكم فرحاين ومبسوطين

صباحين وحتة لاحلى بلوجرز

٢٩ نوفمبر ٢٠٠٨

الى زمن جميل




متهيالى لو الاعلان دة اليومين دول
ممكن يكون

(استخدم كريم جيل عودونى لزعيم القلوب عمرو دياب)

ومع ان الاعلان يعتبر كوميدى الى حد ما ولكن انة اثبات قوى على تعلق الشعب فى وقت من الاوقات حول رمز جليل وقيم
وليس حول ممثل او مطرب مثل شعر الصدر حسين

اة يا بلد!!!!

٢٨ نوفمبر ٢٠٠٨

فتشنى فتش




ابوس ايدك
برىء يا باشا

٢٦ نوفمبر ٢٠٠٨

بدون تعليق




ماعندهومش حكومة بنت.... مجوعاهم

٢٥ نوفمبر ٢٠٠٨

حتى القطط!!!




=عاجبك كدة؟
ادة اخرة اللى يجيب شقة اوضة وصالة

٢٣ نوفمبر ٢٠٠٨

من فات قديمة




بص يا معلم!!

ارجع بالذاكرة حوالى تمانين سنة كدة

معانا النهاردة شاى زوزو

مافيهوش لا تراب ولا نشارة خشب

ما فيهوش حاجات بتنط ولا حتى بتهوهو

خد بالك كمان لو احتجتنا نجيلك على طول

والرقم عندك اهوة

(واخد بالك انة خمس ارقام بس مش تمانية زى دلوقتى!!)

**الاعلان دة رجعنى لايام جميلة كنت اتمنى انى اعيشها ايام كان فية رقى وذوق فى كل حاجة

٢١ نوفمبر ٢٠٠٨

باريدك




مطر الليلة دى ابتدى
وانا بالرحيل موعود

اشوف عينيكى المدى
والمح طريقى سدود

حبيبى

طالت ليالى البعد
زودت تغريبى

حبيبى

بكيت سحابة وعد
دوبت مكاتيبى

لو كان لقانا انقضى
باب الهوى مردود


الكوبلية دة من اغنية قديمة لمصطفى قمر عمرها حوالى 15 سنة من البوم وصاف وهو اول البوم لية

الاغنية منسوجة فى اطار راقى وغاية فى الرومانسية تحت حبات المطر وهو يحزم امتعتة للرحيل عن بلاد حبيبتة التى يحتفظ لها باغلى ذكرى
رسم عيونها طريق ومشاة و سيظل يمشية ولكن السدود تحيط بة من كل مكان
طال فراقهم.. طال الحنين ..ذاب الكلام المكتوب على لهب شمعة كانت تضيىء ما حولة من ظلمة
ولكن مهما طال الرحيل... باب الهوى مردود

١٨ نوفمبر ٢٠٠٨

ودة مين




ياللا يا شباب

لو تخيلنا ان احنا اللى بنجرى مكان الراجل دة

يبقى مين اللى بيجرى ورانا؟

اوعوا حد يقولى الديانة

١٧ نوفمبر ٢٠٠٨

نو بروبلم




بصوا باة

هنركب يعنى هنركب

عشان تعرفوا بس اننا فى نعمة وان بلدنا سكر سكر
!!!!!!

١٦ نوفمبر ٢٠٠٨

طبيعة




رغم ان المشهد كوميدى

الا ان بة عذوبة ورقة واضحة

تمتزج بين ملامح الرجل الامنة والتفاتة البقرة الجميلة

انة التوحد مع الطبيعة

يالها من روعة

١٥ نوفمبر ٢٠٠٨

تحت المطر




كم اشتقت الى السير ساعات تحت المطر

تغرقنى المياة من كل اتجاة

اسمع اصوات الرياح تتخلل الاشجار

اسمع صوت خطوات اوراق الشجر تجرى على الارض

وبركات المياة الصغيرة تملا الحديقة

وتملا معها وجدانى بالحياة

١٤ نوفمبر ٢٠٠٨

قليل من البراءة



عشقى الغريب للقطط

من كل الانواع

بداية من الرومى ولحد الشيرازى

ممكن لو قابلت اى قطة فى الشارع حتى وانا رايح الشغل ولابس فورمال وكدة

ممكن انسى دة كلة واقعد اطبطب عليها بدون وعى

زمان كان عندى قطة سيامى

امورة ولونها فضى فى اسود

كانت بتقعد جنبى على المكتب وانا باذاكر

وكنت باكلها بايدى

وفى الشتا لما الجو يبقى بررررررررررد

وانا تحت اللحاف فى الدفا

كنت فى نص الليل احس بحركة غريبة

الاقيها جاية تقعد جنب رجلى فوق اللحاف عشان تتدفا معايا

وماكنتش اقدر اتحرك ابدا لحد الصبح عشان ما اقلقهاش واصحيها من النوم

عشق غريب

١٠ نوفمبر ٢٠٠٨

حبة كوميدى



*واحد مسطول ماشى فى الشارع قابل واحد مسطول تانى ماسك فى عمود نور وعمال يخبط فية
-اية يا بنى ادم انت بتنيل اية
=يا عم عمال اخبط اخبط ما حدش عاوز يفتح لى
-غريبة اوى مع ان النور منور فوق
!!!!!!!


*واحد مسطول دماغة لفت جابها من الشارع اللى وراة


*مسطول بيسأل مسطول الساعه كام؟ قاله معرفش، قاله غريبه أنا عندي معرفش إلا خمسه



*واحد محشش راح يخطب واحده ..

ابوها قاله:" انا عليا الشقة.."

رد عليه وقاله :" وانا عليا البنات والبيره



* حشاش بيقول لصاحبه:


انا حلمت امبارح أننا بقينا فنانين

.. أنت فنان تشكيلي ..... وأنا فنان أشكيلك

٨ نوفمبر ٢٠٠٨

ويبقى نور



وتبقى دوما بداخلى نقطة من النور


تضفى شعاعا فى زحام حياتى


تناولنى دفقة من بريق الامل


مهما تباعد المشوار


وصعب القرار


وكان الوضع انهيار


تاتى من اعمق نقطة فى القلب

لتمنح الحياة والامل

٥ نوفمبر ٢٠٠٨

كم تقسو


على السادة ركاب الطائرة القادمة من دبى ربط الاحزمة لوصولنا مطار القاهرة

تم الوصول

-ايها السائق.. المهندسين ان تكرمت

تتهادى السيارة فى شوارع مزدحمة يمتزج فيها الناس من كل الالوان ..
الى اين يذهبون ومن اين ياتون
لا احد يدرى

=ها قد وصلنا

المكان : فيلا انيقة فى ارقى حى بالمهندسين

يفتح الباب برفق ليفاجئها

-حبيبتى لقد عدت يا عمرى

وحشتينى كثيرا
خمسة سنوات من العذاب وانا بعيد عنك

كم ذقت المرار لاجل عينيك

لكم اهواكى واعشق همسة من شفتيك

كل ما تمنيتة من جواهر كان لك
وهذا البيت الانيق ايضا

لكم قاسيت مرار الغربة والم الوحدة لاجلك


حبيبتى حبيبتى




(صمت رهيب)

-يفتش عنها فى كل ارجاء المكان



(لا اثر)


ما هذة الورقة المطوية هناك


(يتقدم نحوها وقلبة يخفق بشدة)


يفتحها بايد مرتعشة ... ليجد......

انى راحلة يا حبيبى لم اعد اطيق الانتظار
لم ارد شيئا سواك

٣٠ أكتوبر ٢٠٠٨

حبيبى دائما


الزمان: 101 قبل الميلاد.. المكان حتة من طيبة .. اللى هى مساكن عين شمس دلوقتى)

المنظر: ليل داخلى.. كهف (جروبى اتون بلازا) الشهير

المكان يمتلىء بالمحبين وتقوم بالخدمة حسناوات يرتدين ميكروجيب من جلود الماعز

هناك.. فى ركن هادئ جلس (منوبيس) و (نفرتت) يعقدان اناملهما معا فى ولة وحنين واضح

كلمتى بابابكى يا نفر؟ مش قادر استنى اكتر.. كدة هتضيعى من ايديا

=ماتقلقش يا حبيبى لا يمكن اكون لغيرك.. هاستناك لاخر العمر.. بس ماقولتليش عملت اية؟ لقيت كهف فاضى؟
كهف حبنا

-دورت امبارح فى البرديات كلها لحد ما لقيت اعلان عن كهوف اقتصادية للشباب


=بجد بجد.. قول قول

-بصى يا ستى.. كهف 55 متر على المحارة واقف كاش ب 3000 غنمة حمرا (ماكنش فية فلوس وقتها)

=تمليك مش كدة؟

-اة طبعا.. بس انا مش معايا المبلغ دة كلة..

=طب فية منها ايجار جديد؟

-بس برضة غالى.. بحوالى 300 معزة خضرا والايجار سنة واحدة بس يا يتجدد يا فى الشارع

=طب وبعدين.. اية رايك

-ولا حاجة.. شكلنا كدة هنقعد فى الكهف بتاع بابا (تن بن) لحد ما ربنا يفرجها

=اية دة .. وحماتى تبقى معايا فى شقة.. اصدى كهف واحد..للالالالالالالالالالالالالالالالالالالالا

لو مكانها.. هتعمل ابة؟؟

٩ أكتوبر ٢٠٠٨

قرب قرب


قرب قرب يا محترم

عندنا اللوجوهات للعربيات
خد فكرة واشترى بكرة

مين قال هااات؟

وانا ماشى فى الشارع بقى عندى هواية عجيبة كدة انى اقرا الكلام اللى بيكتبة سواقين العربيات
خصوصا سواقين التاكس!

خد عندك مثلا:

الحلوة دى من الدويقة

ما تبصليش بعين رضية بص اللى اتدفع فيا

عضة اسد ولا نظرة حسد

البطة المرتاحة للسفر والسياحة!!!

بطة اية وفرخة اية بس ايخرب عقولكوا مليتوا البلد


لا وتلاقيلك توك توك صغنن حلو كدة يقولك
....... بس يحير (معلش انا ماقدرتش اكتبها عشان قليلة الادب حبتين)!!!

يا ولاد التيييت هية حصلت؟؟

وبقى كل من عندة اربع كاوتشات متركبين فى قالب جبنة فيتا ولوحين صاج عامل فيها مايكل شوماخر فى زمانة وماشى بيجرى زى برغوت سكن جسم كلب فى الشارع ونازل نط نط نط

العربيات بتنط من اليمين والشمال زى الضفادع فى سباق رالى الفراعنة

لازم نشوف لهم حل.. يا نوفر لهم سرايات صفرا او نوفر لهم الكلل!

٣ أكتوبر ٢٠٠٨

اللهم لك الحمد



من قلب الليل


ياتى النور


ياتى الصفاء


تشرق ايامنا



دروب طويلة


كم مشيناها


كم مللناها


كم ارهقتنا



ولكن الامل يعود



اللهم لك الحمد

٣٠ سبتمبر ٢٠٠٨

ومضة نور



الى اللقاء ايها الشهر الكريم


انرت لنا اياما


وادخلت فى قلوبنا فرحة لا تنسى


ان شاء اللة سنلتقى ثانية


وتضىء لنا اوقاتا جميلة


كل عام وكلنا بخير وسعادة

٢٧ سبتمبر ٢٠٠٨

اكشن



مش عارف يا جماعة واللة اقول اية



المفروض دلوقتى حالا الحريقة شغالة فى المسرح القومى

ايوة حريقة جديدة!



انا عرفت الخبر بالصدفة


سامع واحد خبيث بيقول يا رب اللى بالى بالك يكونوا هناك


للاسف اكيد دلوقتى كلهم بيفطروا فى الفور سيزون


خلينا احنا كدة فى الفول الناتت


نبطل حقد على العالم باة


مش معنى ان همة عايشين فى عز ومحتكرين النحاس ندعى عليهم


لا خلينا برضة احسن!!!

٢٤ سبتمبر ٢٠٠٨

يا ليتها تدوم


تن تن تن


الستوب ووتش بتعد والايام الجميلة بتقول لنا مع السلامة

هتوحشنينا اوى يا ايام
هتوحشنا اوى يا شهر كريم


الحياة كلها كانت حلوة فى وجودك


الحياة كان ليها طعم
ولون وريحة حلوة


ايام مرت كالنسيم
ولانها كالنسيم


كان لازم تمر بسرعة البرق


هيهل علينا يارب
عيد جميل


كلة خير وكحك وغريبة
وبتى فور وبسكوت
اشى بالنشادر واشى بجوز الهند


اوعوا بس تكتروا
وكلة يوزن نفسة قبل العيد بساعة وبعد العيد بساعة
وعلى كل كيلو وزن زيادة هندفعكوا جمرك!
كل سنة وانتوا بالف خير وسعادة

١٧ سبتمبر ٢٠٠٨

حبشتكة يا حبشتكة


زى ما يكون ماسورة مسلسلات وضربت فى التلقزيون؟؟
مش ممكن

وكلها ما شاء اللة بتودى فى سكتين ما لهمش تالت
السرايا الصفرا
او العباسية!!!

امبارح بالليل اتخبطت فى مسلسل تقريبا اسمة حكاية امبارح او حكاية الامس
مش مهم حتى لو حكاية ام اربعة واربعين

للنجمة اللى اكتشفوها فى المتحف الهام شاهين
هية لسة صحيح بتمثل؟؟؟

والادهى ان ميرنا وليد طالعة هيمانة فى الدون جوان مصطفى فهمى
دة تقريبا كاسر عداد السبعين وماشى فى التسعين

بجد هطل ما بعدة هطل!!!!

انا ما قدرتش اشوف غير عشر دقايق بالعافية عشان الضغط والبرى برى

لجل الحظ كمان فية برنامج اسمة وزارة ما تمت
وبجد عشان بييجى وقت الفطار وما فيش غيرة باقعد اتفرج علية زى ....
واللا بلاش

وبدل ما اعصر اللمون على الشوربة
باعصرة على دماغى عشان اتحمل التخريف والاستهبال بتاع التحف اللى جايبينهم

تخيلوا الممثلة الجميلة مشكلتها الوحيدة فى الحياة انها مش بتعرف تلاقى باركنج للعربية
يعنى خلاص الحياة بقت بمبى والعيشة هنية والناس مزقططة ومش قاضل غير الباركنج؟؟

يا ولاد التيييييييييييييييييييييييت


الحاجة الوحيدة اللى عجبتنى فى المدعوق دة هوة (بسنت ودياسطى)
مسلسل كارتون

اية؟؟ بتبصوا لى كدة لية
ومالة الكارتون


بجد دمة شربات وكوميديا بطعم تانى
عجبتنى اوى الحلقة لما بسنت جابت لجوزها دياسطى فى الفالنتين حمار بفيونكة.. اة ما همة فى الارياف يعنى هتجيب لة اية يعنى؟
بس شوف برضة الرقة فيونكة وحركات


١١ سبتمبر ٢٠٠٨

وياتى عالم جديد



ممممممم


الايام دى حاسس ان روحى عالية جدا


ودة بالنسبة لى غريب حبتين


لانى دايما دايما مترقب وقلقان


من اية لا شىء بالتحديد


عاجبنى عالم المدونين وبجد بحس بسعادة كبيرة وانا باتناقش معاهم ونبادل الافكار



لمست بجد جواهم بارقة امل حلوة


ووعى وحس فنى وذوق عالى


وروح طفلة وعقل كبير لامع


الاسامى كتيير ويمكن انسا حد عشان كدة مش هاقول همة مين


بجد غيروا رايى عن الشباب اللى باشوفهم يوميا


ببنطلوناتهم الساقطة


وقمصانهم ام ترتر!!!!


وسلاطاتهم وبابا غنوجهم !!


شكرا على هذا العالم الجميل

كل سنة وكلكوا طيبين نفر نفر نفر

٦ سبتمبر ٢٠٠٨

بعد خراب مالطة!!




مقتل وإصابة العشرات في انهيار صخري بالقاهرة
قال مراسل الجزيرة بالقاهرة إن 18 شخصا على الأقل قتلوا وأصيب 35 آخرون في انهيار كتل صخرية جبلية بمنطقة الدويقة الشعبية بالقاهرة على بيوت آهلة بالسكان مما أدى لانهيار عدد منها.

ونقل المراسل عن سكان قولهم إن هناك حوالي خمسمائة شخص مازالوا تحت الأنقاض. وأفاد شهود عيان ما بين خمسين وسبعين منزلا قد انهارت.

وذكر الشهود أن مئات من العائلات تجمعوا وهم يصرخون ويبكون حول مكان الدمار، وقالوا إن لهم أقارب وأصدقاء تحت الأنقاض ربما لقوا مصرعهم.

وذكر مراسل الجزيرة حسين عبد الغني أن حصيلة القتلى مرشحة للارتفاع نظرا لاكتظاظ المنطقة الفقيرة بالسكان، وبسبب بطء عمليات الإنقاذ واعتمادها على أساليب يدوية.

ولم تصل إلى المكان حتى الآن المعدات اللازمة للحفر وسط الأنقاض لانتشال الناجين، ومعظم أعمال الحفر يقوم بها أقارب وجيران يبحثون عن ناجين أو جثث تحت أكوام الصخر والحطام.


من جانبه توقع النائب عن الدويقة في مجلس الشعب حيدر بغدادي ارتفاع عدد قتلى الكارثة إلى مائتين
، مشيرا إلى أن قرارا اتخذ لإزالة هذه الصخور لكن تطبيقه يتم ببطء شديد.
المصدر:
الجزيرة + وكالات


طبعا يا جماعة التلفزيون الجميل بتاعنا نشر الخبر بعد الحادثة بحوالى ست ساعات

على انة خبر عاجل!!!!!!!!!!


٤ سبتمبر ٢٠٠٨

يا ترى ممكن؟




مش عارف لية بقيت حاسس ان الايام الجميلة كلها كانت زمان


دلوقتى الاحوال يا اما عادى يا اما زفت انما جميلة اشك!!!



زمان لما كنت باقابل واحد كبير فى السن ماشى جنبى


فى الكلية فى الشارع


بتكون خطواتة بالراحة وتاتا تاتا


ومع انى كنت قرد مسلسل
وعمال اتنطط واتحرك بسرعة وانا ماشى زى ما كون فى دقة زار


الا ان كان فية حاجة جوايا بتخلينى امشى بالراحة جنبة انا كمان
ويمكن كمان ابطا منة


مش عارف دة كان صح والا غلط والا امر عادى
بس كنت باحس من جوايا انى فرحان


كنت باحس ان احساس الاخرين حاجة غالية اوى لا يمكن اجرحها او اقرب لها


بس بعد كدة
بمرور الوقت وكتر الاحتكاك بالناس


ابتدى يتكون جوا قلبى تراب
شوية بشوية والنور اللى جواة بدا ينطفى

وينطفى


نفسى يرجع زى الاول


نفسى اثق فى الناس من تانى


نفسى فى اى مكان باشترى حاجة اللى فية ما ينافقنيش عشان التيبس


نفسى الناس تكون برة زى جوة



نفسى فى عالم اجمل
يا ترى ممكن؟

٣٠ أغسطس ٢٠٠٨

عيب اوى





بجد حاجة تفرس



المتاجرة بالدين بقت عينى عينك وعلى الملا للاسف
خد عندك



لتنزيل رنة وحوى يا وحوى اتصل ب صفرين تلات اصفر صفرين
سعر الدقيقة
جنية ونص
تيجى تتصل
يرد عليك الصوت المميز
للغة العربية اضغط الرقم 1
للغة الهندية اضغط 2
للغة الفينيقية اضغط 1100


انتا نمت كويس وحلمت مش كدة؟


عندك خط تفسير الاحلام على الهوا بصوت الشيخة ستوتة



لا استنا ممكن كمان نسمع بلاويك وتفضفض معانا مع المذيع الحبوب (عمرو دبدوب)


عاوز تعمل عمرة؟ نفسك؟
اتصل على الخط الساخن 0900100100 لتكسب رحلة عمرة
(قمار علنى)


كمان فية سحور رمضانى راقص مع الفنانة اللولبية فتكات
وخلى بالكو فية النجم المحبوب كمان
شعر الصدر حسين بتاع طيببببة قلبك!!!
هيييييييييييييييييية



لا وماننساش المسلسلات
العدل جروب يقدم.. حتة مش فى الزنزانة
بطولة النجمة (يمنى)
استنوا معانا واوعوا تقوموا من ادام الشاشة



بجد حرام اوى كدة.. وعلى قناة من القنوات الكوميدى الجديدة مستضيفين بنتين بيغنوا سوا ولابسين... تقريبا مش لابسين
واستنونا فى رمضان



يا جماعة دة رمضان شهر العتق واكرم ما فى الزمن عند رب العالمين
انا عن نفسى للاسف مش متدين اوى ومش باصلى التراويح كل سنة بانتظام بس عندى امل اكون انسان كويس وربنا يا رب يوفقنى واختم القران ان شاء اللة السنة دى
يا رب

٢٦ أغسطس ٢٠٠٨

الارض كروية تلف حول نفسها


شوفتوا ظلم الانسان لاخية الانسان؟؟

الايام دى عندى حنين اوى للماضى
امبارح كنت عمال بافتكر ايام اعدادى

كنا اشقيا اوى وزى ما نكون معجونين فى مية لفت
اصدى مية عفاريت
كورة الصبح قبل جرس الطابور
كورة تانى فى الفسحة
كورة بعد المرواح
اماال مش بيقولوا الارض كروية تلف حول نفسها


الطابور.. اللة يخرب بيت اللى اخترعة
والاذاعة المدرسية.. يووووووووة
والناظر الغتت اللى واقف لنا زى البطة فى الزور


الناظر دة كان عندة خنفسة
لا مش السودة ام رجلين
انا اصدى عربية فولكس موديل توت عنخ
وكمان لونها اصفر!!
وهوة كمان كان شبة عربيتة

فى مرة قفشنى وانا بالعب فيديو جيم فى سنتر جنب المدرسة
وكان محترم اوى اوى معايا!!!


وفى يوم من ايام الصيف كنا بنلعب كورة انا وصحابى فى الحوش
(اهة قمة البراءة)


كنا بنلعب باى حاجة تقع تحت ايدينا

زلطة ماشى.. طوبة اوكى
نقطع ورق من نص الكشكول ونكورة فى كيس السندوتشات شغاال
اماال مش الجش بيقولك اتصرف؟


ما كانش صعبان عليا فى القصة كلها غير بابا
كان كل شهرين تقريبا يتدبس فى كوتشى جديد بدل اللى انا قطعتة
مش باقولكو براءة!!


اة نرجع للماتش.. ورحت شايط الكورة
المفروض شايط فى الجون
بقدرة قادر الكورة سابت الحوش كلة وراحت طالعة الدور الاول من البنى الادارى
ودخلت اوضة الناظر!!!!!

ان ان ان




طااااااااخ
ومر قطار العمر
الفازة اتكسرت !!!!!!

انا ما لحقتش اجرى
لقيتوة فى فانية (اللى هية فتفوتة من الثانية على باب الاوضة)


هاتولى الوااااااااد دة
هجوووووم


وحملت على الاعناق على اوضة الناظر
وبجد كان ذوق ذوق ذوق معايا!!!

مع انى كنت مجرد طفل برىء
يعنى يرضيكوا كدة؟؟

٢٢ أغسطس ٢٠٠٨

ذكريات بطعم خاص



اللة رمضان على الابواب


شهر جميل كل ما افتكرة يجى ادام عيونى صورة فانوس جواة شمعة والدنيا ليل وانا ماسكة باجرى بية فى الشارع والبيوت كلها سهرانة والجوامع متلالاة زى الافراح


الناس وهية رايحة صلاة التراويح , فاكر انى كنت باخلص الفطار ويادوب اصلى المغرب واحاول بس كدة اانتخ ربعاية الاقى الادان الكريم لصلاة العشاء


مش قادر انزل على طول , فكنت باصلى العشاء فى البيت وشوية كدة انزل جرى على الجامع واجرى اجرى عشان الحق صلاة التراويح فى اولها والاقى الجامع من بعيد منور بالوان اصفر وابيض واحمر


اللة, يا رب تعود من تانى
يا رب السنة دى اصلى التراويح بالكامل يا رب



انا فاكر وانا صغير كنت دايما انا واصحابى فى المنتكة بنلعب كورة من بعد العصر لحححححححد بالليل
والحمد للة كنت مواظب على الصلاة وجة معاد صلاة العشا فستوب ودخلنا نصلى الجماعة فى المسجد


المرة دى فى حاجة مختلفة الامام صوتة متغير


لا دة مش هوة اصلا
اللة دة صوتة حلو اوى , وبعد العشا بدا يصلى بينا تانى , واحنا مش عاوزين نمشى والجامع على اخرة , والوقت فات وفات وانا رجلى مش واجعانى زى ما باتلكك على طول واول مرة ادمع من قرايتة للقران


كنت مبسوط جدا ومش عاوز الصلاة تخلص
بس فى النهاية الامام خلص الصلاة


طلع مين الامام؟؟

محمد جبريل


انا ما كنتش اعرفة ولا سمعت عنة قبل كدة انما بعد سنين عرفت انة ما شاء اللة من اشهر القراء فى العالم العربى كلة


يا دوب بقى اروح البيت, اكيد انا اتاخرت حبتين


ياااااااااااا خرابى دة الساعة داخلة على اتناشر بالليل !!!!!


ولقيت والدى فى الشارع عمال يدور عليا بدون جدوى لحد ما اتخبطت فية ولقيتة ادامى
فضل ماسك نفسة ماسك نفسة لحد ما روحنا
دب دب دب المهم اخدت اسطوانة محترمة على التاخير وانتا مش حاسس بالمسئولية و و و و


بس يا والدى الموضوع كذا كذا وحكيت لة على الصلاة الملائكية اللى كنت فيها
بابا هدى تماما ولقيتة انبسط اوى وخدنى من ايدى ورجعنا على الجامع واشترالى شريط تسجيل الصلاة كاملة من ادام الجامع


اياااام حلوة اوى بجد ليها طعم على قلبى احلى من كل حاجة


يا ترى انتوا كمان ليكوا ذكريات فى رمضان؟

١٨ أغسطس ٢٠٠٨

علمنى العوم يا احمد


استنى ياسطى ابوس ايدك

درجن درجن درجن

اووووووب

الحمد للة لحقت االاتوبيس

بقالى ساعة الا ربع واقف مستني ابن الدوج لحد ما شرف

تن تن تن
ياااالهوى دة الاتوبيس عجن فوق بعضة

انزويت فى زخنوق صغنن ورا بعيد عن الشلاليت والبونيات

واذ فجاة تصعد سيدة سمينة ( اوووووووى) وشكلها كدة ارياف

اكيد متدلية مصر فى مصلحة

ودار الحوار الجهنمى التالى:

- يابنى اقرالى العنوان اللى فى الورجة دى اصلى مش م البندر

=مسكت الورقة باقلبها يمين شمال

وش وضهر

شعر ودقن

الورقة فاضية!!!

=يا حاجة الورقة فاضية يمكن غلطتى واديتينى واحدة تانية

دورى معاكى كدة ع العنوان

-ازاى فاضية؟ بص كويس (بحدة شديدة جدا)

=اللهم طولك يا روح

تانى الورقة ناصعة البياض

طب يمكن الكلام مكتوب على حرف الورقة!!!

=يا حاجة حراام

الورقة فاضية فاضييييية
فااااااااااااااااضيييياااااااااا

-ادى اللى خدناة من العلام وسنينة جاتكوا نيييييلة

!!!!!!!!

لو اتحطيت فى موقف لوز زى دة تعمل اية؟؟

١٦ أغسطس ٢٠٠٨

الرقصة الاخيرة


-فيم تفكرين؟


=لا اعلم ولكنك انتزعتنى من بعيد


-ماذا تعنين يا عمرى؟


-لقد كنت خارج كوكبنا

انت من سافر بى عبر الزمان

الى غيمة صغيرة هناك

وامسكت قيثارتك

عزفت لى لحنا لم اشهدة من قبل


=كانك تقراين سطور مشاعرى


-نعم بل واكاد اشم لها رائحة

انها رائحة الزنبق


=اوة يا حبيبتى

متى يكتمل عقد حبنا ليكون نورا ونارا


-نعم سيكتمل

ولن تنطفىء الشمس

١٣ أغسطس ٢٠٠٨

لا تطفئى الشمس


احقا ما اشعر؟
اقالتها..انى اهواك يا املا
اربتت باهدابها على قلبى المجروح

اة ..تعبت من اهاتة

ربما هو حلم؟

ولكن

لماذا المح فى عينيها بريق الامل
ان تحبنى..


ارجوكى
لا تطفئى الشمس



١١ أغسطس ٢٠٠٨

هدوء مؤقت


غموض.. احساس دفين..
خيوط الشمس تذوب فى امواج البحر
نشوة العذوبة
هل يعترينى قلق؟
هل اتوق ان اسير مرة اخرى حافى القدمين فوق هذة الرمال؟
اكاد اسمع همسها..همس الرمال
اهى تنادينى؟

نعم اسمع انينها
اين ذهبت.. ولم هذا الهروب..
الم يكن هذا المكان جنة لك؟
الم تكن تلك الصخرة هناك شاهدة للحظات لا تنسى..
اين.. اين؟
وظل الصوت ذاتة يتردد

وبلا رحمة

٧ أغسطس ٢٠٠٨

مخالى شل يا عسكـــــرى!!!


طبعا لما خلصنا الثانوية العامة الميمونة ,عارفين طبعا المصير البمبى اللى هيقابلنا.. يا اما فى الشارع او... برضة فى الشارع!
وفى النهاية هيكون مصيرنا زى (اللى بالى بالك) شوفوا لهم حل يا تجيبوا لهم شغل..ياتوفروا لهم الكلل....


بس عليك وعالوحدة الصحية ... اصدى الكليات العسكرية.. ايوة.. مرتب محترم.. منصب طحن.. علاج ببلاش.. نوادى ببلاش.. مساكن فى مدينة نصر بالتقسيييط المريييح..
من الاخر عيشة مانجة


صحيت الصبح ... بدرى جدا جدا حتى الديك عند الجيران كان لسة مانتخ ...واللة فكرتنى بالديك اللى كان فى العمارة اللى جنب عمرو صاحبى

كنا بايتين عندة فى الوكر ...البيت فاضى ومامتة فى العمرة يعنى من الاخر البوليس بعيد



شلة المقاطيع هجوووووووم

الللى مشغل مزيكا واللى بيلعب roadraash على الكمبيوتر واللى اعدين بيدردشوا

اية دة دة فية اتنين كمان بيلعبوا راكت فى الصالون!!


بقى مالاخر مركز شباب حبانية!


من التعب نمنا ما حسيناش الا والديك بيدن

لية هوة احنا امتى؟ يا خرابى دة الساعة 9 امال المجنون دة بيدن لية؟؟؟

كوكوكو اسكت كوكوكو!!!
يا ابن اللذين.. مسكت كتاب المحاسبة ودب॥ تقريبا كدة هوة هيبطل يدن تانى.. لا صبح ولا ليل!


المهم كنا بنقول اية اة الكلية الحربية !


رحت بدرى جدا عشان اسحب الملف يا نهار بطيخ امم امم.. الناس دى جت منين ..دول تقريبا قد قطر فاضلهم جوز عساكر ويعلنوا الحرب!..


وانا اللى قلت اروح بدرى عشان انجز فى الونجز

اوهااااام !!!

وبعد ساعات انتظار سحبت الملف , تقريبا كان ب 55 جنية

اشمعنى 55 مش عارف بس طبعا اضرب فى ضحية ... اصدى فرد الافااات يا معلم


نقرى بقى المنيو.. اصدى قائمة الاختبارات..
اولا: القدرات.. من عينة النملة.. مذكر والا مؤنث؟ ولية سموا الجمبرى جمبرى وما سمهوش بعجرى؟؟
يا خراابى جنان دة والا اية؟؟


بس الحمد للة عدينا


ثانيا:الكشف الطبى.. ان ان ان .. مقبرة الغزاة.. هيطلعوا لنا القطط الفاطسة بقى.. امسك المسدس واصطاد لنا الفرخة اللى واقفة على رجل واحدة هناك فى الفيوم!!! يا مصبر الوحش يا رب


اية دة كمان.. لازم تشرب.. اصدى لازم تحط القطرة.. لية هوة انا هاعمل نظارة؟؟ نفذ الاوامر يا عسكرى.
غير لائق.. قاع عين.. نظرك 6/9 ..طب ماهو حلو الحمد للة.. قلنا غير لائق.. بالسلامة يا بابا.
ان ان ان ان... وضاع العمر يا z احمد


اة دة القطرة كمان بتخلى الرؤية طشاشx طشاش.. طب هاروح ازاى.. خرجت من الكلية الحربية وفضلت ماشى جنب السور (طويييييل اوى) مانا لو نزلت فى الشارع مش هاشوف العربيات وممكن تحصل حاجات مش ولابد..
لو سمحت॥ رقمة كام الاتوبيس دة؟ دة 975 يا والدى.. شكرا يا بنى (والدى؟؟ يا جدعان انا مش عجووووز انا بس حاطط قطرة .. بس)


من الاخر كان يوم موووز موووز.. والا اية رايكوا

٣ أغسطس ٢٠٠٨

يوو يوو يوو


دول طقم العصابة ننننفر ننننفر (جنان دة والا اية) معلش ماجاش عشان عندة فردة توصيلة مكروباااص لاول فيصل وخلى بالكوا... الكنبة خمسة ورا
ويباركلة!






يوو يوو يوو...


منور يا عم الحاج!




كبر الجى وروق الدى...




بسلطاتك بباباغنوجك...








الواد دة جامد يا جدعان, انا ما كنتش عارف انة مخرج الحاسة السابعة, هوة الفيلم ما نجحش فى السينما عشان الابطال كلهم جداد ما عدا الدجال اللذيذ (ودلوقتى هتقدر تسمع الافكار عووووو) احمد راتب , فطبعا الفيلم ما فيهوش كمان مناظر وكمان مش انتاج السبكى جولدن ماير وبالتالى الفيلم نفض لنفسة , بس الواد دة بجد حكاية , فكر عالى , دماغ محششة... اوبس اصدى متكلفة




مش عارف لية جاى فى دماغى المشهد بتاع الفيشاوى فى الفيلم لما دخل بيتو وراح مجعر بعلو صوتة (انا خدت بطولة الجمهووووووورية)




وتسمع فى الخلفية كومبنيشن (تشششششششششش)




بلد بتاعة شهادات صحييييح




والا اية رايكوا؟؟

٢٣ يوليو ٢٠٠٨

اوع السياااات




والله حاجة تجنن لما باكون في الشارع وألاقى العربيات اللي ماشية حواليا عمالة بتنط من اليمين والشمال زى ما تكون براغيت سكنت جسم كلب وهاتك زووو من اليمين ومن الشمال ومن فوق!!

وما فيش اى مشكلة انك تلاقى واحد بعربية سيات اديمة موديل أمنحتب الخامس وبتدور بحجرين انرجايزر وتلاقيه داخل سبق مع عربية دزنانور BMW منظر عجيب والأعجب أنى شفت برضة عربية تانية سيات والراجل طالع بيها على طريق مرسى مطرووووح!!!!

يا قادر يا مفترى اية الجبروت دة؟ دة السكة حوالى 700 كيلومتر ودى على ما توصل ممكن يكون فصل الصيف فات من يومين وهوة لسه ماشى خارم الدواسة على 18 كيلو!!

واحد صاحبي كان عندة عربية سيات قديمة من أم بابين والواد المجنون كان فاكك الدركسيون ومركبة جوة علبة سمنة روابى! منظر تحفة والحقيقة مش عارف هوة كدة من كتر العبقرية والا التخلف اللي هوة فية؟ ويمكن برضة يكون لة وجهة نظر مش السمنة دى بتربرب وتخلى الواحد حلو كدة؟ يمكن في يوم يصحى يلاقيها بقت بورش والا جاجوار والا حتى شاهين.. بس كل ما كنت افوت علية اتاكد الاقيها برضة زى ما هي سياااات!!

وبعدين العربية دى ليها وضع خاص ومن كتر ما هى صغيرة كان بيركنها فوق الرصيف مش جنبة زى بقية خلق الله.. اماااال يا ابنى اللى عدى عدى.

ما شاء الله صاحبي دة دخل كلية الهندسة وتقريبا طلع السادس على الدفعة وحاليا هوة في شركة مرسيدس ..والله الواد دة سرة باتع بس احنا اللي ما كناش فاهمين.

بس برضة كان واد مجرم ومصيبة..مرة كنت فايت علية وانا رايح اشترى عيش (قبل ما يبقى الرغيف بنص جنية عشان حاليا باكل طوب مجفف عشان ارخص) ولاقيتة فاكك موتور العربية وكل فتفوتة في حتة !!!! يا ابن اللذين دة انا لو فكيت علبة كاسيت مش باعرف اركبها وغالبا بتتكسر انتا بقى فكيت عربية!!!! صحيح ميكرو عربية بس في النهاية بتقول بيب؟؟؟

اية يا بنى لية الخراب دة؟ -اصلى اخدت معايا الموتور الكلية عشان كنت عاوز الدكتور يشرح لى حاجة علية!!! موتور حتة واحدة؟ هوة موتور عجلة!!

مصيبة تانية! قالي اركب نطلع نعط بالعربية! نعط؟ بس دة احنا بالترنجات وهننزل نعط بشباشب زيكو!! -واية يعنى ما احنا جوة العربية هوة احنا رايحين السراج مول؟ المهم نزلنا واعدنا نلفلف في مدينة نصر شوية ودخلنا عباس العقاد وفى نص الشارع عند شيخ البلد العربية زرجنت ورأسها والف فردة ما تتعتع ابدا يادى الحوسة ؟ طب ودى نجيب لها ميكانيكى والا حد من ورشة النجارة اللي ع الناصية يشوفها؟ ونزلنا طبعا عشان نشوفها والناس حوالينا بيبصوا لنا زى ما نكون بياعين سارحين بعربية بيكيااااااا!!!!

أيام غريبة بس جميلة اصحابى وحشونى جدا..

٣ يوليو ٢٠٠٨

ملوخية... ملوخية

اية دة؟؟؟ هوا أنا نمت كل دة ؟ معلش واضح انى تقلت العشا حبتين فخبطت لى يجى تمن تسع شهور انتخة.. بس تصدقوا ! مش عارف شكلى عاوز انام تانى.

الجو اليومين دول حر جدا لدرجة انى تخيلت ان فية عصفورة وقعت من السما مشوية جاهزة من الحر؟ يمكن باحلم؟ او تاثير العشا؟ اهو عموما بعد كدة غالبا لا فية عشا ولا غدا ولا اى حاجة وغالبا هتكون الوجبة الرسمية رمل وزلط ؟

مش عارف اية اللى خلانى اتجنن واقول ما تروح يا واد شبرق نفسك واشترى كيلو والا اتنين لحمة ؟ ومش عارف يا خويا اية الجراةا دى ولقيت نفسى واقف قدام الجزار وعمال يبص للساطور فى ايدة ويبص لى؟ منور يا سيدنا لفندى..

احمم .. يا سلام لحمة !!! اةةةة فاكر شكلها؟ اية دة ! بافرك فى عينيا! لا دة بجد بافرك تانى يمكن اكون لسة متنيل نايم! !!! الكيلو ب 48 جنية؟؟؟؟؟ معقول أنا فاكر انها قريب اوى كانت ب 23 او بالكتير اوى 25 جنية؟؟ طب اقول اية للراجل؟ ادينى تمن كيلو؟؟ طب حط لى عضمتين فى كيس وابوس ايدى شعر ودقن؟ يا نهار فحلؤى غامق مممكن تطلع فى الاخر لحمة كائنات جميلة لها ديل وبتهوهو او يمكن متطورة اكتر وبتنهق؟ ولسة هافتح بقى....