٤ سبتمبر ٢٠٠٨

يا ترى ممكن؟




مش عارف لية بقيت حاسس ان الايام الجميلة كلها كانت زمان


دلوقتى الاحوال يا اما عادى يا اما زفت انما جميلة اشك!!!



زمان لما كنت باقابل واحد كبير فى السن ماشى جنبى


فى الكلية فى الشارع


بتكون خطواتة بالراحة وتاتا تاتا


ومع انى كنت قرد مسلسل
وعمال اتنطط واتحرك بسرعة وانا ماشى زى ما كون فى دقة زار


الا ان كان فية حاجة جوايا بتخلينى امشى بالراحة جنبة انا كمان
ويمكن كمان ابطا منة


مش عارف دة كان صح والا غلط والا امر عادى
بس كنت باحس من جوايا انى فرحان


كنت باحس ان احساس الاخرين حاجة غالية اوى لا يمكن اجرحها او اقرب لها


بس بعد كدة
بمرور الوقت وكتر الاحتكاك بالناس


ابتدى يتكون جوا قلبى تراب
شوية بشوية والنور اللى جواة بدا ينطفى

وينطفى


نفسى يرجع زى الاول


نفسى اثق فى الناس من تانى


نفسى فى اى مكان باشترى حاجة اللى فية ما ينافقنيش عشان التيبس


نفسى الناس تكون برة زى جوة



نفسى فى عالم اجمل
يا ترى ممكن؟

هناك ٣٢ تعليقًا:

صدى الصمت - عاشقة الورد - يقول...

أخيراً أول تعليق .....
أكيد ممكن كل شىء يرجع زى زمان ويكون أحسن من زمان كمان بس عشان دة يحصل لازم الناس تفوق من الغيبوبة ال غرقانين كلهم فيها احنا محتاجين شىء نتجمع عليه كلنا عشان نرجع زى زمان

Abu Shahin يقول...

احب الاول اصبح عليك

واقولك ان خالد كساب لو تسمع عنه قبل كده كتب

ورقة بيضا
كنا احنا
وإحنا لسة
صغيرين
لكن قلم السنين
بيشخبط براءتنا
بيشخبط طهارتنا
بيشخبط شقاوتنا
بيزرع شوك
يغطى بضلّه نبتتنا
ويبقى الحزن
أبونا وأمنا وبيتنا
وأنا والليل
نلاقى الجرح تالتنا
ونتمنّى
ونستنّى
ونتحنّى
بحلم جميل يرجعّنا
لأيامنا
أيام ماكنّا
ورقة بيضا
وإحنا لسّة صغيرين


هو قلم السنين كده

الجميل فيك انك عايز ترجع لقلبك البرئ ودى ف حد ذاتها برءاة

تحياتى

EMMY BABY يقول...

والله انا بتعب لما بسمع الكلام ده

كنت فاكرة ان انا لوحدى اللى عايزة ارجع زى زمان

بس فوجئت ان معظم المدونبين والناس تقريبا نفسهم يرجعوا زى زمان


مش عارفة لو حضرتك خت بالك من الكلمات اللى حطاها فى اول مدونتى تقريبا هو ده احساسنا كلنا

والله مش عارفة اقول ايه بس دايما السؤال اللى مجيرنى هل الاطفال دلوقتى حاسين باللى كنا بنحسه زمان واحنا بقينا كدة بس علشان كبرنا

ولا حتى الاطفال كمان بقوا مش حاسين بالبراءة ولا يعرفوها

معلش طولت عليك

اصل البوست جه على الجرح


تحياتى

ايمى

الريم يقول...

اممممم

مش عارفة ااقولك ايه


بس مش انت لوحدك تقريبا كلنا كده

المشكلة احنا عمرنا كام سنة

احنا لسه صغيرين اوى على الاحساس ده

بس ديه مشكلة جيل بحاله

بيحن للزمان الجميل اللى بنسمع عنه

من اهالينا وجدودنا

الناس كانت طيبة وبسيطة

انما دلوقتى ايه كم الشر والكراهية اللى جوا

البشر ده

wafaa يقول...

ان الله لا يغير ما بقوم حتى يغيروا ما بانفسهم

احنا الى اتغيرنا والزمن اتغيير بينا
حاول ترجع كده لسلوكبات وشقاوة زمان هتحس ان الدنيا لسه بخير

تقبل مرورى
وفاء

سميرة يقول...

صباح الفل
اولاً: اول مرة ع المدونة بس بجد حلوة
ثانياً: بالنسبةللبوست فأنا اعتقد والله اعلم ان الكلام الجميل اللي انت قلته كااااااان موجود في يوتوبيا الفاضلة بتاعة عمنا افلاطون الله يرحمه ، بس مافيش مانع انه يكون موجود في يوم ما ، بس لازم احنا كبشر نغير من نفسنا الاول علشان نشوف كل شئ جميل ، يعني احنا لازم نكون ابيض من جوا ، وبلاش الكاروهات اللي بقى في قلوب الناس ، واكيد لما نحب نفسنا ونتصالح معها كل شئ هايكون جميل.
اسفةورمت دماغك
تحياتي
:)))

RASHA يقول...

اعذرنى لو قلتلك مش ممكن!
ده املنا كلنا عالم جميل
مليان حب وخالى من الكراهية والنفاق تفتكر ده موجود متهيالى ممكن يكون موجود فى احلامنا بس
فمتحاولش عشان متتعبش اتمنى انى مكنش احبطك زيادة

maha zein يقول...

بص هي الدنيا ذي ما هي
بس احنا اللى بنتغير
يعني رمضان مثلا ذي ما هو
بس بيتهيقلي اننا احنا اللى بنتغري وبنكبر
مش عرفة
بس بيتهيقلي انت اللى اتغيرت
يعني
حاول ترجع تبص للحياه حلوة تاني
او متحطش في بالك بقه
انا في اعتقادي
ان اللى فات صعب يرجع
بس سهل بردو اننا نعيش اجمل منه في الحاضر
بس بأيدنا نخليه اجمل
تحياتي

صباح الصباح يقول...

صدى الصمت..

اسعدنى تشريفك جدا جدا
للاسف زى ما قلت قبل كدة ان الحياة طغى عليها الجانب المادى عن الروحى فى كل شىء وهية دى المشكلة.

صباح الصباح يقول...

abu shahin

نورتنا يا فندم.. طبعا اعرف خالد كساب اللى بيحرر باب (ضربة شمس) فى الدستور واسلوبة فعلا دماغ متكلفة

وزى ما فعلا قال

قلم السنين
بيشخبط براءتنا

يا رب نحاول نحب بعض من تانى كلنا.

صباح الصباح يقول...

ايمى..

الكلام الى انتى كاتباة اد ما اسلوبة جميل ورقيق الا ان بية مرارة وحنين غير عادى لايام جميلة مضت

فية اغنية لعمرو دياب تقريبا بنفس المعنى بتقول

كنا حبايب اعز حبايب
راح الحب كانة ما كان

مين كان عاشق مرة وقادر
يقدر يرجع زى زمان

بس يا ايمى ما تيجى نحاول نحسن من نفسنا ولو تاتا تاتا وباذن اللة ربنا مش هيسيبنا وهيوفقنا.

صباح الصباح يقول...

الريم..

يا صاحبى زماننا غير

زمن اللى شافوا الخير

همة زمانهم كان

كلة غرام وحنين

واحنا زماننا يا صاحبى

اول شباب وشاب

على فكرة دى اغنية اديمة اوى لايهاب توفيق بس بجد كانها بتوصف حالنا دلوقتى.

صباح الصباح يقول...

وفاء..

طبعا صح يا وفاء
احنا اللى اتغيرنا
بس مش اللوم كلة علينا
فية اسباب كتير كتير للحال اللى بقينا فية

خدى عندك الانحلال الاخلاقى فى التلفزيون
المطربة الفلانية بقت هية القدوة
التعليم فى الكازوزة
تعسف ورشاوى علنى فى المرور وغيرة فى اى مصلحة

وكتير كتير

انما برضة كان لازن نكون اقوى ونواجة .. وباذن اللة هنقدر

صباح الصباح يقول...

سميرة..

صح يا سميرة.. لازم نكون ابيض من جوانا
بس المهم ازاى
اوعى تقولى لى استخدم ايريال والا برسيل
هههههههههههه

لازم نرجع لاساسيات الدين الجميل واحنا نبقى فى القمة.

صباح الصباح يقول...

شاشا..

طبعا مش هاقولك الدنيا بمبى زى ما جرايد الاهرام والجمهورية بيقولةا لان الحال واضح جدا لاى حد نظرة شيش بيش

بس لية ما نحاولش
حتى لو بحاجة بسيطة اوى

وليكن مثلا زيارة ايتام فى الدار
وبعدين واحدة واحدة نطلع لحاجات اكبر

ما تيجوا نجرب كلنا؟

صباح الصباح يقول...

مها زين..

ما نا باحاول يا مها ويا رب فعلا ابقى احسن.

kochia يقول...

عاوز نرجع للزمان بتاعك انت ولا زمان بتاع بابا وماما ولا اي زمان ؟؟؟
علي فكرة الزمان موجود بس جد عليه انه بقي قليل لان الناس كتير اوي
انت اهو دليل
ولو دورت هتلاقي فيه غيرك زيك تمام
انا متفائلة
بس الظروف "المادية" فرصت اوي علي الناس خلتهم خايفين وبقي جوة مش زي برة
زمان اكيد موجود جوة ناس كتير
انت بس دور عليه

تحياتي

غير معرف يقول...

صعب برة زى جوا قى فرق برة عن جوا برة احساس وجوا اجساس تانى تانى خالص مينفعش يكون احساس برة زى احساس جوا واحساس جوا اجمل بكتير من احساس برة انا عن نفسى بحب جوا مش بحب برة وناس كتير بتحب جوا مش برة واكيد اللى يجرب جوا عمره ما يطلع برة ما هو حيروح فين جوا الدفا وبرة الهفا صباحك لبن

مهرة سالم يقول...

اولا (ولاتقنطو من رحمة الله)
ثانيا (الخير باقي في امة الرسول الكريم عليه أفضل الصلاة والتسليم الى يوم الدين)
أكيد ممكن تكون الدنيا أفضل
من الآن ,وأفضل من السابق..
تقبل مروري

☼♫♪ عمــاد الدين يــوسف ☼♫♪ يقول...

أكيـــــــــــد ممكن والي يقول غير كده يبقى مش عايز تغيير
ســـداني خلي عندك امل في الله اولا ثم في نفسك والناس ، اكيد لسه في ناس كويسه
ونفسها الامور تتغير هي كمان

Unknown يقول...

كل سنة و أنت طيب و رمضان كريم

ممكن يكون فيه عالم أجمل بأذن الله مدام فيه ثقة في الله و أمل

Unknown يقول...

لكل أحبائي المدونين أرجوا زيارتي للتعرف علي تفاصيل أفطار جماعي

انسانةعادية فى عالم مش عادى يقول...

السلام عليكم ورحمة الله وبركاته
بوست جميل تقريبا ده احساس كل الناس وبالاخص الشباب دلوقتى بس المشكلة مش فى الدنيا اللى اتغيرت احنا اللى اتغيرنا للاسف بس اكيد ممكن الدنيا تكون اجمل ولو احنا عايزها اجمل بس افترك احنا خلاص بستسهل ومش عايزين نفرح
حتى لما بنفرح بنكون خايفين من اللى جاى

صباح الصباح يقول...

كوشيا..

فعلا الموضوع محتاج وقفة كبيرة ونعيد حساباتنا من جديد وربنا الموفق ان شاء اللة.

صباح الصباح يقول...

غير معرف..

كلامك جميل بجد بس للاشف مش دايما جوانا الدفا.. ساعات القلب بيصدى ويحتاج يتجلى من جديد ولو احتاج الامر صعوبة الا انة ضرورى جدا

كا عام وانت بخير

صباح الصباح يقول...

m.k

اكيد لسة فية ناس طيبين .. بس يا ترى هنلاقيهم فين وتعرفهم ازاى؟

يا رب الناس كلها تلاجع تحب بعض تانى

صباح الصباح يقول...

العمدة..

يا رب فعلا الحب يسود الناس ويختفى اللى بنشوفة كل يوم

منور يا مان

صباح الصباح يقول...

عاليا..

يا رب يا عاليا الكون يرجع نقى زى ما كان يا رب..

الفطار فى الساقية فعلا فكرة هايلة ان شاء اللة احاول احضر لو قدرت اخلص شغل بدرى..

دمتى بكل ود

صباح الصباح يقول...

انسانة عادية..

ما هو للاسف المجتمع هوة اللى اكسب قلوبنا الجمود دة بالقسوة الاجتماعية والانانية والطبقية حاججاااات كتير

يا رب الامور تتحسن وان كنت اشك ان يكون قريب.

زُمُرده يقول...

ياااااااااه
لسه في ناس زيي بتحلم ونفسها الاحلام تتحقق

كل ما بنكبر كل ما بنشوف اكتر
كل ما القلب يتوجع اكتر
والفرح مننا يهرب اكتر
وفي لحظه تاخدنا ضحكه لورا سنييييييين

ونقول يا هل ترى ممكن؟؟

كل شيء ممكن


بس قول يارب ومتسيبش الناس تاخدد منك


زمرده زي زمان

صباح الصباح يقول...

زمردة..

يا اهلا يا اهلا باختى العزيزة.. واضح ان الحالة النفسية ما شاء اللة بقت حلوة يارب دايما

دعاء مواجهات يقول...

الممكن دايما موجود

لأن مهما كتلا التلوث الأخلاقى

اكيد بردو هيفضل نسبة كويسة نظيفه

ابحث عنها

وربما تصادفها فى ايامك

ملحوظة::

لما تصادفها ابقى دلنى عليها بليز

سلااام

ديما منورنى