٧ أغسطس ٢٠٠٨

مخالى شل يا عسكـــــرى!!!


طبعا لما خلصنا الثانوية العامة الميمونة ,عارفين طبعا المصير البمبى اللى هيقابلنا.. يا اما فى الشارع او... برضة فى الشارع!
وفى النهاية هيكون مصيرنا زى (اللى بالى بالك) شوفوا لهم حل يا تجيبوا لهم شغل..ياتوفروا لهم الكلل....


بس عليك وعالوحدة الصحية ... اصدى الكليات العسكرية.. ايوة.. مرتب محترم.. منصب طحن.. علاج ببلاش.. نوادى ببلاش.. مساكن فى مدينة نصر بالتقسيييط المريييح..
من الاخر عيشة مانجة


صحيت الصبح ... بدرى جدا جدا حتى الديك عند الجيران كان لسة مانتخ ...واللة فكرتنى بالديك اللى كان فى العمارة اللى جنب عمرو صاحبى

كنا بايتين عندة فى الوكر ...البيت فاضى ومامتة فى العمرة يعنى من الاخر البوليس بعيد



شلة المقاطيع هجوووووووم

الللى مشغل مزيكا واللى بيلعب roadraash على الكمبيوتر واللى اعدين بيدردشوا

اية دة دة فية اتنين كمان بيلعبوا راكت فى الصالون!!


بقى مالاخر مركز شباب حبانية!


من التعب نمنا ما حسيناش الا والديك بيدن

لية هوة احنا امتى؟ يا خرابى دة الساعة 9 امال المجنون دة بيدن لية؟؟؟

كوكوكو اسكت كوكوكو!!!
يا ابن اللذين.. مسكت كتاب المحاسبة ودب॥ تقريبا كدة هوة هيبطل يدن تانى.. لا صبح ولا ليل!


المهم كنا بنقول اية اة الكلية الحربية !


رحت بدرى جدا عشان اسحب الملف يا نهار بطيخ امم امم.. الناس دى جت منين ..دول تقريبا قد قطر فاضلهم جوز عساكر ويعلنوا الحرب!..


وانا اللى قلت اروح بدرى عشان انجز فى الونجز

اوهااااام !!!

وبعد ساعات انتظار سحبت الملف , تقريبا كان ب 55 جنية

اشمعنى 55 مش عارف بس طبعا اضرب فى ضحية ... اصدى فرد الافااات يا معلم


نقرى بقى المنيو.. اصدى قائمة الاختبارات..
اولا: القدرات.. من عينة النملة.. مذكر والا مؤنث؟ ولية سموا الجمبرى جمبرى وما سمهوش بعجرى؟؟
يا خراابى جنان دة والا اية؟؟


بس الحمد للة عدينا


ثانيا:الكشف الطبى.. ان ان ان .. مقبرة الغزاة.. هيطلعوا لنا القطط الفاطسة بقى.. امسك المسدس واصطاد لنا الفرخة اللى واقفة على رجل واحدة هناك فى الفيوم!!! يا مصبر الوحش يا رب


اية دة كمان.. لازم تشرب.. اصدى لازم تحط القطرة.. لية هوة انا هاعمل نظارة؟؟ نفذ الاوامر يا عسكرى.
غير لائق.. قاع عين.. نظرك 6/9 ..طب ماهو حلو الحمد للة.. قلنا غير لائق.. بالسلامة يا بابا.
ان ان ان ان... وضاع العمر يا z احمد


اة دة القطرة كمان بتخلى الرؤية طشاشx طشاش.. طب هاروح ازاى.. خرجت من الكلية الحربية وفضلت ماشى جنب السور (طويييييل اوى) مانا لو نزلت فى الشارع مش هاشوف العربيات وممكن تحصل حاجات مش ولابد..
لو سمحت॥ رقمة كام الاتوبيس دة؟ دة 975 يا والدى.. شكرا يا بنى (والدى؟؟ يا جدعان انا مش عجووووز انا بس حاطط قطرة .. بس)


من الاخر كان يوم موووز موووز.. والا اية رايكوا

هناك ٤٢ تعليقًا:

مجلة الأم الصغيرة يقول...

أحلى حاجة في اليوم ده إنك لسة فاكره بتفاصيله ...
بس برضو صعبان عليا الديك :(

دمت مميز كعادتك .. :)

Ghada , Rofayda يقول...

انا اكتر حاجه ضايقتني هي القطره...اصلي مجرباها بس اكيد مش في الكليه الحربيه...وقعدت يومين مش شااااايفه والناس فاكراني عاميه واللي يقول حكم السن وما شابه...

تحياااااتي

دمت بخير

مصر يا موكوسه .....يا مزارع الكوسه يقول...

والله مش صعبان عليا فى كل ده
الا الديك
حرام عليك قطعت خلفه
ده انت شكلك مفترىىىىىىىى
المهم
هقولك الكلمه الغلسة اللى بحس انى هولع فى اللى بيكتبهالى
تدوينه هايله
تحياتى
كل ودى

صباح الصباح يقول...

قطرات من شواطىء الحياة:
صباح الخيرات..
ما هو الديك اللى يستاهل حد يدن الساعة 9 .. اكيد كان سهران ادام الفيلم..
هههههههة

صباح الصباح يقول...

ghada & Rofayda
لا طبعا.. اكيد مش فى الكلية الحربية.. انا ساعات باستخدم بريزولين لما عينى بتوجعنى من الكمبيوتر.. انما زى القطرة بتاعتهم.. عمر ما ورد عليا!!
دمت بكل ود

صباح الصباح يقول...

الفشلة بنات..
منورانا دايما.. انما بصراحة الديك ابن لذين ويستاهل.. الساعة 9 الصبح.. دة عندة حول ادراكى...
هههههههههة

زُمُرده يقول...

بموووووووت في الذكريات وخصوصا لما اللي يحكيها كومديان زيك

بس بجد هي دي بلدنا

عايز منصب وفلوس وسلطه وحياه مرتاحه كله فيها ببلالالالالالالالالاش

عليك والكليات العسكريه والشرطه واللذي منه

والخيره فيما اختاره الله واكيد الخير مكنش ليك فيها

هو يعني الديك هيفضل طول عمره شطوور ويصحى بدري
ايه مش من حقه يأنتخ حبتين يعني

مش شايف الاتوبيس
طيب
لو بنت روشه عدت كنت هتشوفها ولا؟؟؟

هههههههههههه

RASHA يقول...

اكيد كان يوم موززززززز

شفـقــة و إحســــان يقول...

موز موز موز واللهى البوست تحفة

عروس البحر يقول...

ل فعلا البوست مووز موزززززززززز مووز
بس لو سمحت المرة الجاية عايزينوا يكون بوست برتقااااال برتقااااال برتقال
تحياتي

oRiGiNaL HeArT يقول...

معلش تعيش وتاخد غيرها :)
وربنا يعوض عليك ويكون مستقبلك افضل

انسان وبس ! يقول...

صباح الخير

يبقى انت اكيد فى مصر

بس عارف يمكن احسن منتجح طبى وتطلع كشف هيئه هتتخنق اكتر

تحياتى

صباح الصباح يقول...

زمردة:
طب انتى قوليلى دلوقتى الواحد يدر ياخد شقة صالة ومطبخ (من غير اوض) بكاام؟؟ يا اما اخدها من قاصرها واشترى شقتين فول وافتحهم على بعض.. ما كلها شقق..
ههههههة
منورانا دايما.

صباح الصباح يقول...

shasha
بجد كان يوم مووووووووز بس كلة زحلقة

صباح الصباح يقول...

شفقة هانم واحسان بك..
صباح السكر والبندق والعين جمل

صباح الصباح يقول...

عروس البحر:
خلاص يا ستى ليكى عليا المرة الجاية ان شاء اللة اجيب لك كيلو الا ربع برتقااان.
نورتينى

صباح الصباح يقول...

original heart
الحمد للة .. اكيد طبعا دة كان الخير.. بس للاسف الانسان مش بيقدر يعرف وقتها اذا كان دة اللى فية مصلحتة والا لا..
صباحك سكر

صباح الصباح يقول...

انسان بلا عنوان..
بس بجد انا وكل الموجودين اتبهدلنا يوميها جدا..
موووز موووز

Empress appy يقول...

يا ابنى هو اى اى لازم طبعا يبهدلوهم
المهم القطره عامله ايه ههههههههههه

صباح الصباح يقول...

appy
لا.. الحمد للة القطرة مفعولها راح..ما هى برضة مش قطرة جملى..دى من سوق الجمعة..
ههههههههة
نورتينى جدا

Mona Shereif يقول...

والله بتبقى زكريات حلوة وبتوحشنا البهدلة دى
صوح؟؟؟

صباح الصباح يقول...

sometimes:
فعلا فعلا والمثل بيقول old is gold
مش ممكن ابدا ننسى الايام دى

M.a.r.y.o.o.o.m يقول...

صباح الفل انت بجد زي العسل
بص بقي احلي حاجه انجز في الونجز وايه كمان
وفى النهاية هيكون مصيرنا زى (اللى بالى بالك) شوفوا لهم حل يا تجيبوا لهم شغل..ياتوفروا لهم الكلل....
تحياتي ودمت متألقاً

مدحت محمد يقول...

حلوة ياzاحمد دى

هههههههههه


دمك خفيف جدا الصراحة


تحياتى وتقديرى لحضرتك

المنسى يقول...

هههههههههه
زاد عدد المدوانات اإللى بدخلها وأضحك
لثلاثة
إنت
وسووووو
ولماضة
إيه يابنى الأسلوب ده ماشاء الله عليك
وبتحط قطرة كمان
وسيد أحمد وبتاع
ده إنت معدى
متحلمش تدخل الكلية الحربية أو أو كلية عسكرية لأنت ولا أى حد بيروح الوكر
لأن دى
لعلية القوم بس
مش إحنا
صباح الفل
وصبا الصباح

Unknown يقول...

مدونتك مدها خفيفة لكنها لا تخلوا من الهموم اليومية و الجدية فى الأحساس بمن حولك و ده متميز جدااااااااااا

صباح الصباح يقول...

maryoum
نورتينى..
صباحك سكر مكرر

صباح الصباح يقول...

مدحت محمد:
صباح الانوار.. نورت المكان كلة.

صباح الصباح يقول...

المنسى..
منورنى دايما.. والبوست بتاعك اكتر من هايل.. بس برضة اوعى تنزل بالكامير لاحسن تتمسك تحرى..
ههههههههههههههة

صباح الصباح يقول...

عاليا حليم..
ربنا يخليكى يارب على الاطراء الجميل دة.. وفعلا مهما حاولنا نخرج من همومنا.. اكيد يفضل اثر جوانا.. بس ممكن الوقت يمحية
نورتينى جدا جدا.

(المهاجر الى الله) يقول...

ادعوك لزيارة مدونتى المتواضعة والمساهمة بارائك وتعليقاتك
www.eyuon.blogspot.com
وشكرا

شيتوس الاهلاويه اووووي يقول...

حرام عليك والله والديك ذنبه ايييييييه؟؟؟؟؟؟
ههههههههههه
بس والله بوست لذيذ ولو علي موضوع الكليه الحربيه دي اقدار ونصيب ماحدش يقدر يعترض وانت عارف بلدنا بيطلعوا القطط الفاطسه وهما لو بصوا علي نفسهم مش هيلاقوا قطط هيلاقوا جاموس وخرفان اه والله هههههههههه
دمت بخير
تقبل مروري وتحياتي ليك
أختك شيتوس

maha zein يقول...

الا ما اعرف حد دخلك يا كلية يا حربية انتي واتقبل فيكي
اومال مين الي بيقبل يا جدعان
بس تمام كده
مش اهم حاجة ناولت الديك
خلاص
المهم نظرك بعد القطرة كام دلوقت
اوعه يا ريس تكون فقدت البؤبؤ
اوعاك
ازعل والله

دعاء مواجهات يقول...

ههههههههههههههههههههههه

انا سمعت كتير وقليل

بس مسمعتش عن النملة والفرخة الى فالفيوم دى ياعم

ربنا يعينك

مش خلصت منهم

خلاااص

اتكتبلك عمر جديد ياعمنا

بيس

منتظرااك

صباح الصباح يقول...

المهاجر الى اللة..
ان شاء اللة ونورتنا

صباح الصباح يقول...

شيتوس::
ياعم الاهلاوى يا عم..دورى شغال.. كاس شغال.. بطولات داخلية.. عالمية..
جاااامد جااامد
نورتينااا جدا

صباح الصباح يقول...

maha zein:
انتى بالذات ما تتكلميش عن المصايب بعد اللى عملتية يا شقية فى البوست الاخير بتاعك..
امل بالنسبة للكلية الحربية.. قكلة والحمد للة بيطلع فى الغسيل.
هههههههههههههههههة

صباح الصباح يقول...

دعاء مواجهات..
مش هتصدقى يا دعاء ان فية ناس تطوعوا قبل ما اقدم فى الاختبارات وقعدوا يدونى امثلة وامثلة للاسئلة اللى ممكن تيجى..وملازم شبة نماذج الامتحانات.. ومش بعيد كمان يكون فية سلاح التلميذ..وكانت انقح بكتير من اللى قلتة..
صباحك سكر مكررررر

Mina يقول...

علي فكرة نفس اللي حصل معاك ده حصل معايا بكل تفاصيله بس كان معايا بالعكس
القطرة والاختبارات والكشف الطبي
وفي الاخر مقبول ياعسكري
يانهار اسود ياجماعة ده انا اعمي (كان نظري -4.5) ياجماعة ده انا عندي القلب ولا حد سمع حاجة
بس انا ماكنتش في الكلية الحربية
انا كنت داخل الجيييييييش

صباح الصباح يقول...

manamibo>>
بص يا ريس.. طالما ليك ايدتين ورجلتين.. هاتلبس يعنى هاتبس.
ههههههههههههة

mohra يقول...

و الله ربنا انقذك يابنى
بس تعرف انت بتفكرنى باخويا قوى

صباح الصباح يقول...

mohra
الحمد للة.. فعلا لو كنت اتقبلت.. كنت هاتربط طول عمرى وبدون مفر..
اية دة هوة اخوكة كان هيلبس هوة كمان؟؟
نورتيييينى