٤ أغسطس ٢٠٠٧

بين شطين ومية



كل يوم شغل , كل يوم نفس الاشكال الضالة اللى الواحد مضطر معاها يبتسم الابتسامة البلهاء اياها كل ما تشوف خلقهم , نقدر نسمية نفاق اجتماعى
واللة مانا رايح الشغل النهاردة , ترررن ترررن الو حسام بك ازيك يابنى اية نظامك نشد على اسكندرية , طب مش كونت تقولى من الاول عشان اجهز نفسى , تجهز اية وبتاع اية هوة انتا هتفتح عكا؟؟, المهم المعاد على واحدة ونص يللا سى يو, المعاد رمسيس عند اشهر محل كبدة وسجق (اللى تحت الكوبرى) انا فاكر انى حضرتة ايام ما كان (الشندوشت) ب 15 قرش وتلاقى امم علية (العجيب ان ما فيش لا كلب ولا قطة فى المنطقة كلها (طازة ويفضل طازة), منظر مهول ناس من كل حتة مستنيين زينا بالضبط مكروباس اسكندرية , ادى واحد اتنين ..... دول حوالى متين نفر يا نهار الوان, هنركب ازاى ,الرجالة بتضرب بالبوكسات حتى الستات بتجرى على المكروباصات وبتضرب بالشلاليت واللى يرمى اى ورقة على الكرسى جواة ويقولك حاجز 5 كراسى , بجد حاجة قلة قيمة والناس بتتصرف زى الرعاع , منظر زبالة , طبعا مع جو زى دة ما ركبناش قبل الساعة تلاتة , دة حتى السواق لما جيت اتكلم معاة لقيتوا مش عارف طريق اسكندرية , ازاى يا عم؟؟ ما هو يا بية انا خطى مدينة نصر –رمسيس وباعمل الدور دة كادوة (يا عينى ع الكومبليمو).
اهى كملت العربية مش مكيفة طبعا والساعة تلاتة يعنى هنوصل اسكندرية متفحمين , بس كلة يهون عشان نطفش من المحروسة, وصلنا على ستة كدة , سبحان اللة مع انى شفت البحر مليون مرة قبل كدة الا انى ما باقدرش ارفع عينى من علية, منظر خلاب والنسمة وااااااااااااو , حيلكوا يا شباب لازم الاول نروح نحجز الفندق , مكانة فى محطة الرمل , هوة مش كلاس اوى بس شغال , فى الدور الثامن , العمارة شكلها على الطراز الرومانى , يااة دى ما تقلش عن متين وخمسين سنة, الحمد للة اخيرا مكان ضلة , انت ريحت قوم , اقوم ؟؟ عاوزين ننزل المية, ما تخلوها بكرة؟, لا لا النهاردة , امرى للة وقف يا عم خدنا معاك لاقرب شط, امرك يا بية عاوزين حاجة مكن واللا اى كلام والسلام؟ مكن؟ هوة احنا رايحين نحشش, لا حاجة معقولة , اللة وقف هنا دة شط ستانلى , يا للجمال, المية بتبرق زى ما تكون خلاص الموج هيتكلم , الى الماااااءو انا بقالى مددة مش باعوم بس يوميها بجد انبسط اوى وقعدنا فى امية لغاية المغرب ياااة رجعتونى لايام جميلة ايام ما كنا بنطلع مع اصحابنا فى الكلية العريش والمقالب اللى يا ما عملناها فى بعض والطبيخ المضروب , فينك يا عمنا ؟؟

هناك ٨ تعليقات:

Ghada , Rofayda يقول...

بجد حرااااام الجو حر
وانت بتقول بحر ومييييييه
ده كتييييير
اتقي غيظ القلوب
.....تحياااااااتي

غير معرف يقول...

صباح الصباح
واللة المشكلة مش فى الحر بس يا رفيدة المشكلة غى الناس العجيبة اللى باقابلها كل يوم والا الاسعار! دانا باحاول اجيب 2 كيلو لحمة بقالى اسبوع وعمال احسبها مش نافعة ابدا؟
ما حدش يقوللى ربنا يسهلك

000000 يقول...

ربنا يسهلها معانا فى الجو ده
اما بالنسبة للاسكندرية فانا ماروحتهاش قبل كده خااالص ونفسى اروحها
ادعو لى ازورها ..

غير معرف يقول...

صباح الصباح
تصدقى يمكن الجو فى القاهرة احسن من الاسكندرية بكتير , هوة حلو بس عالبحر انما لما تمشى فى اى مكان او جوة الشالية رطوبة وتلزيق زى ما اكون وقعت فى برطمان عسل وطبعا لا دش نافع والحل الوحيد ان كل شوية ادلق عليا جردل مية ساقعة عشان افك شوية
انما سيبك برضة البحر بحر واسكندرية مارية انا باحبها اوى واحلى حاجة فيها المشى فى شوارعها بالليل فى الشتا والمطر

maha zein يقول...

الله
انت كمان فكرتني باصحابي وبالمعسكرات وبجو السفر والرحلات
انت شكلك متاثر ذي بالظبط
انا كمان متأثرة
عماله افتكر واتفرج علي الصور
وزعلانة اوي علي ذكريات زمان
بس عارف
انا اتفقت مع اصحابي اننا نطلع اسكندرية بردو
بس ناخد امهاتنا معانا
بس المرة دي هنعد في شقتنا مش في العمارة الرومانية
هى فى العجمي
بس النظرية البحر
سيبك بقه من القلعة والجو ده
الاهم هو البحر
والعجمي فيها بحر
فعادي مش لازم اسكندرية البلد بقه وكده
عارف بنحاول نرجع الذكريات
او يعني نصيف فى جو رائع
اوف خلتني احس بالخنقة
ربنا يجمعك بصحابك تاني
بس حتي لو جمعكم
بتلاقي ان الاحاسيس والناس اتغيرت بردو
او يمكن الزمن هو الي اتغير
الله اعلم
تحياتي

صباح الصباح يقول...

اللة.. رايحة العجمى.. ياعم يا عم
تروحى وتيجى بالف سلامة..

Mina يقول...

علي فكرة انا اكلت كتيييييير من الراجل اللي تحت الكوبري بتاع الكفتة والسجق ده بس ايام ماكان الساندوتش بربع جنيه
مالحقتش انا ابو 15 قرش ده
يالله كانت ايام
ومش عارف ياجدع من يومها وانا حاسس اني عايز اهوهو
تفتكر ليه؟ّّّ!!!!

صباح الصباح يقول...

manamino
لا يا عم.. ربع جنية اية !!
دلوقتى عقبال املتك بقى بنص جنية .. بس برضة كلابة دايما طازة عشان كدة مش ببطلة ابدا.
نورتتتنى جدا