١٤ يناير ٢٠١٠

نسمات





اد اية بابقى نفسى انام كمان شوية كل يوم الصبح قبا ما انزل الشغل

الدفا تحت البطانية جميل والجو برة برررررررررررررررررد

كل يوم بانزل الشغل من ستة الصبح بابقى فى الشارع

واد ما باكون فرحان انى لوحدى فى الشارع الهادى

ما فيش دوشة ولا عربيات ولا ناس طبعا هوة فية حد بينزل بدرى كدة يعنى؟

الجو بيكون برررررررد قوى وباشد اللبس عليا جامد وبرضة ما فيش فايدة

الهوا بيتسرب ليا وباحس انى باتجمد

انما المنظر اد اية خلاب الصبح

الشمس يا دوب لسة بتطلع مكسوفة من ورا السحاب

والهوا بيحرك الشجر

والريح بتشاغل اوراقها

بجد اد اية الكون جميل

سبحانك يارب

هناك ١٦ تعليقًا:

saragebaly يقول...

سبحان الله

خلق فأبدع فأحسن الخلق

*********

بتفكرني بأيام الامتحانات في التيرم الأول

بيكون شتا وبنزل من البيت من 6 الصبح

برغم الثلج الي بيخبط في الوش الا انه بيكون له ريحة حلوة اوي

تحس ان الهوا سايب الكون كله والناس النيمانة وجاي يعاكسك ويقولك مالك؟؟


صباحك جميل ان شاء الله

دمت بكل خير

سارة

اقدم عاصمه فى الحب يقول...

السلام عليكم

سبحان الله
فعلا بيقى منظر جميل
تبارك الله احسن الخالقين

.
بابا زمان كان كل يوم الصبح بينزل تحت الدوش الساقع ويظبط نفسه بالهدوم ويطلع الشغل .
فعلا والله كل يوم
بس الصحه بقه انت عارف
لما كان بيعمل كده ما كانش بيحس بالساقعه بعد كده
وطبعا دى تجربه مستحيله بالنسبه لشباب اليومين دول
بس هى طريقه ناجحه وخلاص
.
صباحك فل :)

Unknown يقول...

الكون حلو فى النفس الحلوة
وكما قال الشاعر
كن جميلا ترى الوجود جميلا
سبحان الله على نعمه التى لا تعد ولا تحصى

وفقك الله

صدى الصمت - عاشقة الورد - يقول...

مصر كلها لما بتشوفها قبل الفجر بشوية ووقت الشروق بتكون جنة الله فى الأرض وبتحب الوقت مايخلص والزحمة ما تبدأش
تحياتى

Mahmoud البطراوى يقول...

هو للموضوع سبب علمى المشى فى الصبح بيحفز افراز هرمون الاندروفين فبتحس انك سعيد

ربنا يسعدك يارب :D

طوبه فضه وطوبه دهب يقول...

تعرف انه فعلا اجمل احساس واروع شعور رغم ان الواحد بيجى عليه وقت بيكره الشغل والحياه وقت ما بيخرج من تحت البطانيه وبيحس بالحقد على كل اللى فى البيت انهم متكلفتين ونايمين وهو لا لكن مجرد ما بينزل الشارع والهوا الساقع يخبط وشه ويفوق بيحس احساس مختلف بيحس انه اتنفس الهوا قبل ما حد ياخده غيره وخد اجمل اكسجين ونسمه فى الدنيا الله بعشق الشتا

☼♫♪ عمــاد الدين يــوسف ☼♫♪ يقول...

صبح صبح حبيبي

انا عشت 6 سنين من عمري حريص ان مواعيد شغلي تكون في شيفت ( النايت ) يعني من 2 باليل وانت طالع
وقت غاية في الجمال خصوصا وانت ماشي لوحدك تقريبا في شوارع قد لا تجد فيها مكان تريح الزلاموكه في وقت اخر
بجد انت في نعمة الصحيان بدري ده والله نعمة كفاية انك بتصلي الفجر حاضر ولو تعرف الفايدة من صحيان الصبح عمرك مهتبطل العاده الجميلة ديه

صبح تاتا

well يقول...

خلينا نتكلم عن نص الكباية المليان (جمال الصبح)
لو عاوز تشوف مصر صح تشوفها بهدوئها بعيد عن الزحمة والدوشة تشوفها بجاملها اللى احلى من الجمال الاوربى يبقى لازم تشوفها الساعة 6 الصبح
وبالمناسبة دى احب اهديلك اغنية 6 الصبح لحسين الجسمى برعاية صباح الصباح
تحياتى

صباح الصباح يقول...

سارة

صباح البنور يا سارة
يادى الامتحانات اللى مش بتخلص ابدا.... طمنينى عملتى اية فى الامتحانات وانتى فى سنة كام دلوقتى

ربنا يوفقك دايما يا رب

صباح الصباح يقول...

اقدم عاصمة فى الحب

صباحك سكر يا مان

ربنا يدى الوالد طول العمر والصحة اللهم امين

شباب زمان فعلا كانوا اقوى وبيتحملوا اكتر كتير من شباب دلوقتى ويمكن الحياة السهلة هية السبب او عدم الرغبة فى تحمل المسئولية

كل الود

صباح الصباح يقول...

نهر الحب

صباح الفل يا نوسا ويارب دايما تكونى بخير وسلام

فعلا كن جميلا ترى الوجود جميلا

صباح الصباح يقول...

صدى الصمت

فعلا الفجر اجمل وقت ممكن تنزل فية الشارع وتستمتع بالهوا النقى والندى الرقيق

صباح الصباح يقول...

بطوط حبوب

طبعا يا دوك كل فى تخصصة .. وفعلا الاندروفين هو هرمون السعادة ويارب يديمها عليك نعمة

صباح الصباح يقول...

طوبة فضة وطوبة دهب

ودة بالضبط اللى قصدى علية

ههههههههههههه انا باحقد على اللى بيصحوا متاخر اشمعنا انا يعنى؟

كل الود

صباح الصباح يقول...

عمدة

حبيبى يا مان

شفت من 2 بالليل طب بتروح ازاى؟؟ مش بدرى اوى كدة؟

ربنا يوفقك يا باشا

صباح الصباح يقول...

well

نورتنا يا مان وشكرا على الاهداء الجميل