23 يوليو، 2008

اوع السياااات




والله حاجة تجنن لما باكون في الشارع وألاقى العربيات اللي ماشية حواليا عمالة بتنط من اليمين والشمال زى ما تكون براغيت سكنت جسم كلب وهاتك زووو من اليمين ومن الشمال ومن فوق!!

وما فيش اى مشكلة انك تلاقى واحد بعربية سيات اديمة موديل أمنحتب الخامس وبتدور بحجرين انرجايزر وتلاقيه داخل سبق مع عربية دزنانور BMW منظر عجيب والأعجب أنى شفت برضة عربية تانية سيات والراجل طالع بيها على طريق مرسى مطرووووح!!!!

يا قادر يا مفترى اية الجبروت دة؟ دة السكة حوالى 700 كيلومتر ودى على ما توصل ممكن يكون فصل الصيف فات من يومين وهوة لسه ماشى خارم الدواسة على 18 كيلو!!

واحد صاحبي كان عندة عربية سيات قديمة من أم بابين والواد المجنون كان فاكك الدركسيون ومركبة جوة علبة سمنة روابى! منظر تحفة والحقيقة مش عارف هوة كدة من كتر العبقرية والا التخلف اللي هوة فية؟ ويمكن برضة يكون لة وجهة نظر مش السمنة دى بتربرب وتخلى الواحد حلو كدة؟ يمكن في يوم يصحى يلاقيها بقت بورش والا جاجوار والا حتى شاهين.. بس كل ما كنت افوت علية اتاكد الاقيها برضة زى ما هي سياااات!!

وبعدين العربية دى ليها وضع خاص ومن كتر ما هى صغيرة كان بيركنها فوق الرصيف مش جنبة زى بقية خلق الله.. اماااال يا ابنى اللى عدى عدى.

ما شاء الله صاحبي دة دخل كلية الهندسة وتقريبا طلع السادس على الدفعة وحاليا هوة في شركة مرسيدس ..والله الواد دة سرة باتع بس احنا اللي ما كناش فاهمين.

بس برضة كان واد مجرم ومصيبة..مرة كنت فايت علية وانا رايح اشترى عيش (قبل ما يبقى الرغيف بنص جنية عشان حاليا باكل طوب مجفف عشان ارخص) ولاقيتة فاكك موتور العربية وكل فتفوتة في حتة !!!! يا ابن اللذين دة انا لو فكيت علبة كاسيت مش باعرف اركبها وغالبا بتتكسر انتا بقى فكيت عربية!!!! صحيح ميكرو عربية بس في النهاية بتقول بيب؟؟؟

اية يا بنى لية الخراب دة؟ -اصلى اخدت معايا الموتور الكلية عشان كنت عاوز الدكتور يشرح لى حاجة علية!!! موتور حتة واحدة؟ هوة موتور عجلة!!

مصيبة تانية! قالي اركب نطلع نعط بالعربية! نعط؟ بس دة احنا بالترنجات وهننزل نعط بشباشب زيكو!! -واية يعنى ما احنا جوة العربية هوة احنا رايحين السراج مول؟ المهم نزلنا واعدنا نلفلف في مدينة نصر شوية ودخلنا عباس العقاد وفى نص الشارع عند شيخ البلد العربية زرجنت ورأسها والف فردة ما تتعتع ابدا يادى الحوسة ؟ طب ودى نجيب لها ميكانيكى والا حد من ورشة النجارة اللي ع الناصية يشوفها؟ ونزلنا طبعا عشان نشوفها والناس حوالينا بيبصوا لنا زى ما نكون بياعين سارحين بعربية بيكيااااااا!!!!

أيام غريبة بس جميلة اصحابى وحشونى جدا..

3 يوليو، 2008

ملوخية... ملوخية

اية دة؟؟؟ هوا أنا نمت كل دة ؟ معلش واضح انى تقلت العشا حبتين فخبطت لى يجى تمن تسع شهور انتخة.. بس تصدقوا ! مش عارف شكلى عاوز انام تانى.

الجو اليومين دول حر جدا لدرجة انى تخيلت ان فية عصفورة وقعت من السما مشوية جاهزة من الحر؟ يمكن باحلم؟ او تاثير العشا؟ اهو عموما بعد كدة غالبا لا فية عشا ولا غدا ولا اى حاجة وغالبا هتكون الوجبة الرسمية رمل وزلط ؟

مش عارف اية اللى خلانى اتجنن واقول ما تروح يا واد شبرق نفسك واشترى كيلو والا اتنين لحمة ؟ ومش عارف يا خويا اية الجراةا دى ولقيت نفسى واقف قدام الجزار وعمال يبص للساطور فى ايدة ويبص لى؟ منور يا سيدنا لفندى..

احمم .. يا سلام لحمة !!! اةةةة فاكر شكلها؟ اية دة ! بافرك فى عينيا! لا دة بجد بافرك تانى يمكن اكون لسة متنيل نايم! !!! الكيلو ب 48 جنية؟؟؟؟؟ معقول أنا فاكر انها قريب اوى كانت ب 23 او بالكتير اوى 25 جنية؟؟ طب اقول اية للراجل؟ ادينى تمن كيلو؟؟ طب حط لى عضمتين فى كيس وابوس ايدى شعر ودقن؟ يا نهار فحلؤى غامق مممكن تطلع فى الاخر لحمة كائنات جميلة لها ديل وبتهوهو او يمكن متطورة اكتر وبتنهق؟ ولسة هافتح بقى....